ქუჩა, რომელსაც ტაძრამდე მივყევართ

26062013601

  ძვირფასო დუშელებო, როგორც თქვენთვის ცნობილია, ჩვენი არასამთავრობო ორგანიზაცია უკვე მეოთხე წელია, რაც ქალაქ დუშეთის კულტურული მემკვიდრეობის დაცვის თემაზე მუშაობს. ჩვენს მიერ განვლილი დროის განმავლობაში გაწეული მუშაობის შესახებ უახლოეს დღეებში მოგაწვდით სრულ ინფორმაციას.

   დღეს გვინდა მოკლედ გაუწყოთ ქალაქის ყველაზე მნიშვნელოვანი ერთი პატარა ქუჩის შესახებ. ეს ვიწრო ქუჩა ისტორიული დუშეთის ჩრდილოეთ უბანში მდებარეობს, ატარებს სააკაძის სახელს, მისი სიგრძე დაახლოებით 350–400 მეტრია. ქუჩა დასაწყისს რუსთაველის ქუჩის ბოლოდან იღებს და კურკოს ტყისაკენ აღმართს მიუყვება. მასზე ქალაქის ორი უმნიშვნელოვანესი კულტურული მემკვიდრეობის ძეგლი მდებარეობს: გრიგოლ განმანათლებლის სახელობის მე–IX საუკუნის ეკლესია და ყარანგოზიშვილების კოშკი, სახელად  „შეუპოვარი“.

   ჩვენთვის ცნობილი გახდა იმ სახელმწიფო შესყიდვის შესახებ, რომლითაც მოხდა ქალაქის სხვადასხვა ქუჩების, მათ შორის სააკაძის ქუჩის ამ ნაწილის, მოასფალტების საპროექტო მომსახურეობის შესყიდვა. პროექტანტებისათვის მიცემული ტექნიკური დავალება იყო მარტივი არითმეტიკა: სიგრძე, სიგანე და ასფალტის საფარი.

   17 ივნისს წერილით მივმართეთ მუნიციპალიტეტს (საკრებულოსაც და გამგეობასაც) თხოვნით, მოეხდინათ  დაინტერესებულ მხარეთა შეხვედრის ორგანიზება, მათ შორის პროექტანტისაც, ტექნიკური დავალების ზუსტი მოცემულობის განსაზღვრის მიზნით. იგივე მოთხოვნით ადრესატებს განმეორებით მივმართეთ 28 ივნისსაც, პირადი შეხვედრის დროსაც გავაცანით ჩვენი არგუმენტაცია: თუ ჩვენი მიზანია, განვითარების ხაზია _ ქალაქის კულტურული მემკვიდრეობის საფუძველზე, ადგილზე ეკონომიკური განვითარების უზრუნველყოფა, ყველა ინფრასტრუქტურული პროექტი, მათ შორის ქუჩების საფარის დაგება, უნდა განხილული იქნას ამ კონტექსტში. სააკაძის ქუჩის ამ ნაწილზე ასფალტის საფარს დაგება, ამ თვალსაზრისით, შორს არის მთავარი თემიდან. გარდა ტექნიკური სახის საკითხების მოგვარებისა  (ქუჩის პროფილის შეცვლა ნალექის ეკლესიიდან და ქუჩის ქვედა მხარეს განთავსებული კერძო მაცხოვრებელთა სახლებიდან ასაცილებლად, ეკლესიის დაზიანებული დამცავი კედლის ნაწილის რეკონსტრუქციის აუცილებლობა, ქუჩის საყრდენი კედლის გამაგრება–რეკონსტრუქცია და სხვა), პროექტი უნდა ემსახურებოდეს ისტორიული უბნის არქიტექტურული იერსახის უზრუნველყოფას.

   01 ივლისს დასახმარებლად მივმართეთ უკვე საქართველოს ძეგლთა დაცვის ეროვნულ სააგენტოს. გუშინ, 11 ივლისს ადგილზე მოსულ სპეციალისტთა ჯგუფის მიერ შესწავლილი იქნა მდგომარეობა. მოხდა აზრთა თანხვედრა: არსებული პროექტის ტექნიკურ მხარესთან დაკავშირებით მიცემული იქნა გარკვეული შენიშვნები, მაგრამ იმის გათვალისწინებით, რომ ეს ქალაქის ისტორიული ნაწილის უმნიშვნელოვანესი ქუჩაა, სადაც ორი უმთავრესი კულტურული მემკვიდრეობის ძეგლი მდებარეობს, რეკომენდირებული იქნა არა ასფალტის, არამედ ქვაფენილის საფარი. სააგენტოდან მიღებული წერილობითი დასკვნა გამოქვეყნებული იქნება საიტზე დაუყონებლივ.

   მადლობა მინდა გითხრათ ყველა იმ დუშელ მოქალაქეს, რომლებიც გვეკონტაქტებოდით და მხარს გვიჭერდით საკითხზე.

  დუშეთის კულტურული მემკვიდრეობის დაცვის

საზოგადოებრივი ჯგუფის სახელით, ლია როინიშვილი

Share to Facebook
Share to Google Plus
Share to MyWorld
Share to Odnoklassniki